宝贝最后还想争取一下：“阿姨，侬一定帮帮我……”
宝宝伊阿姨抚摸着宝宝的背脊，语重心长起来，讲：“阿姨老了，已经没有老早的魄力和勇气了。乖，听闲话，侬起来，”
宝宝只好就此打住，慢慢地起身，宝宝此刻的心情是沉重的，宝宝晓得，从今早开始，以至于今后一段老长的辰光里，又回到了以往的无奈，焦虑，无望的境况，等着伊的还是一天天难过的日子，还是一个个没有办法入眠的一夜夜。艾米丽回屋里的希望还是渺茫，不晓得还要等到啥辰光……
也就是这个辰光，弄堂里也出事体了。
汪家好婆老早就养成了习惯，老底子，欢喜手里捏根油条边啃边走，到弄堂里兜兜圈子，到各家门口头张张看看，讲讲闲话，消磨辰光，是一种乐趣，是一种习惯，改不掉了。啥人晓得，一只跟头掼得住了几个月的医院，实在闷煞了。好不容易毛病好了，回到了屋里，宝宝一天到夜看牢子，一歇歇关心东，一歇歇关心西，寸步不离，一点自由也没有。
今早宝宝一早出门去看阿姨了。汪家好婆一个人在屋里，总算没有人管头管脚了，吃好早饭，开出门来，弄堂里阳光明媚，脚头有点痒了，想到弄堂里去兜兜，虽然还要撑拐棒，有点不方便，念头还是熬不牢，一撑一拐地出门兜圈子去了。
一路走过去，一时头里总觉得少了点东西，想想，手指头的金戒指没有了，手里油条也没有了，有点失落。
不过，一路上不断有人称赞：“汪家好婆气色蛮好”“汪家好婆走路蛮稳扎了”“汪家好婆还是跟老早一样有精神。”一路还有人不断地关心问好：“汪家好婆早饭吃过伐？”“汪家好婆走路当心哦。”一路上讲不败的闲话，汪家好婆还是觉得非常受用。走得更加起劲了。一瘸一拐地撑着拐棒的精神头也更加足了，不知不觉，整条弄堂走了遍……
毕竟叫关辰光没有兜弄堂了，有点吃力，就往屋里走去。
拐过大弄堂，朝小弄堂的转弯角的地方，听到小囡的哭声，看过去，肖光棍拖牢一个小囡朝外跑，嘴巴里叽叽咕咕，讲：“不要让人困觉了？要哭滚远点。”