平常辰光，跷脚女人一直孤身一人，独来独往，身边没有一个人能商量商量。只好一个人，担心得觉也困不着，饭也吃不下。
本来，跷脚女人也想过，要寻三层阁爷叔商量商量，三层阁爷叔就住在楼上，天天碰头，而且三层阁爷叔又是一个有文化的人，能讲会说，知书达理，寻三层阁爷叔最妥当。当天伊决定去寻三层阁爷叔的辰光，一只脚都已经蹋到了上楼的楼梯上了，要去讨教讨教三层阁爷叔，听听伊会有哪能的讲法了。
转念又想想，自己平常经常敲三层阁爷叔竹杠，要紧要慢的辰光，三层阁爷叔肯定不会给自家好面孔看，肯定会碰一鼻头灰。于是就放弃了去寻三层阁爷叔的念头，从楼梯口退回了自家房间……
再下去，想来想去也想不出有啥人好商量了。
猛然之间，跷脚女人想到了16号里的孙家姆妈，平常去小菜场买菜，路过孙家姆妈门口头，孙家姆妈时常会在门口叫牢跷脚女人，跟伊打招呼：“小跷脚，阿是去买菜啊。”
弄堂里的人统统晓得孙家底子厚，是有铜钿人家，都要巴结孙家，所以跷脚女人一听到孙家姆妈朝自家打招呼，就开心。
弄堂里厢，一向老少有人会跟跷脚女人打招呼，真有事体，最多叫伊一声：“喂，跷脚。”虽然都叫伊跷脚，一样是叫“跷脚”，孙家姆妈叫伊，前头加上一个“小”字，少一个“喂”字好像就亲切交关。跷脚女人就欢喜听。
而且，孙家姆妈时常会让跷脚女人帮伊带点小菜回来，回头，小菜铜钿一分不会少，还总归会多给跷脚女人加两钿跑脚铜钿，跷脚女人就觉得孙家姆妈是个好人。鬼使神差地就去寻了16号里的孙家姆妈，把赤佬男人哪能当了逃犯，近一腔要回来的事体跟孙家姆妈一五一十地统统都讲了个清清爽爽。
孙家姆妈平常没有听说过跷脚女人结过婚，伊啥地方来的男人？现在一听到跷脚女人突然讲起有了男人，已经一惊，心想，肯定是个野路子男人，是非法男女关系。接下来又听讲到这个男人是个逃犯，更加惊得不轻，表面上对跷脚女人讲：“侬不要怕，我来帮侬想办法。”孙家姆妈一上来，先稳牢了跷脚女人，然后好言相送跷脚女人。
跷脚女人摸不透底细，跟孙家姆妈摊了底牌，肚皮的心事一吐为快，又有人肯帮自家作主，像寻到了依靠，心里轻松了，欢欢喜喜回去了，当天夜饭吃了两碗泡饭，当夜觉也困得着觉了。